Os dereitos da infancia son fundamentais para garantir un futuro seguro e xusto para nenos, nenas e adolescentes. No noso último proceso participativo mozas e mozos de Galicia tiveron a oportunidade de coñecer e facer seguimento dos seus dereitos.
Con motivo da conmemoración do Día Universal dos Dereitos da Infancia, a Plataforma de Organizacións de Infancia de Galicia mediante a Plataforma de Infancia estatal en colaboración co Ministerio de Xuventude e Infancia e a Xunta de Galicia, organiza un proceso participativo para que nenos, nenas e adolescentes poidan coñecer e facer seguimento dos seus dereitos, recollidos na Convención sobre os Dereitos da Infancia (CDN).
💡 Dentro do proxecto Dereitos da Infancia: Aprenden e participan nos seus dereitos, este ano o lema é «ISTO VAI DE DEREITOS» dentro do proceso participativo dos Dereitos da Infancia 2024 e propoñémosvos participar neste proceso para reflexionar e dialogar con mozas e mozos sobre o cumprimento de 4 dereitos, elixidos por elas e eles mesmos:
❌O dereito á non discriminación
🪁O dereito ao xogo e ao tempo libre
🛡️O dereito á protección fronte á violencia
🩺O dereito á saúde
En particular, dende o grupo de Participación Infantil e Adolescente da POIG xa participamos neste proceso participativo centrándonos en dous Dereitos da Infancia fundamentais: o Dereito á Protección Fronte á Violencia e o Dereito á Non Discriminación.
A continuación mostrámosvos as actividades que realizamos!
Dereito á Protección Fronte á Violencia
Para abordar o Dereito á Protección Fronte á Violencia, realizamos unha actividade chamada «Inventar unha Historia Colaborativa».
Nesta actividade, colocamos ao grupo en círculo e comezamos a crear unha historia utilizando un pano como símbolo de protección e coidado. Cada neno e nena achegou unha parte á historia, empregando o pano de diferentes maneiras para representar accións de bo trato e protección. Anotamos todas estas accións nun lugar visible para todos e todas.
Preguntamos aos participantes sobre as accións de bo trato que máis lles sorprenderon e as máis comúns. Reflexionamos sobre como crear contornas seguras e que precisamos para fomentar o bo trato cara aos demais.
Ao final da actividade, explicamos a importancia da LOPIVI (Lei Orgánica de Protección Integral á Infancia e a Adolescencia fronte á Violencia) e como define as contornas seguras.
Dereito á Non Discriminación
A segunda actividade que realizamos centrouse no Dereito á Non Discriminación.
Lemos diferentes situacións en alto para que os mozos e mozas decidiran de maneira individual se eran afirmacións verdadeiras ou falsas. Esta dinámica xerou un debate enriquecedor onde os participantes argumentaron as súas eleccións e puideron cambiar de opinión tras escoitar aos seus compañeiros.
Durante esta xornada, reflexionamos sobre as situacións onde as persoas adultas lles din “aínda non tes a idade” e debatemos sobre se as mozas e mozos son tratados como persoas con dereitos.
A través desta actividade, entendemos mellor a importancia de promover a igualdade e o respecto mutuo en todos os ámbitos da vida.
Impacto e Futuro: A Reflexión sobre os Dereitos da Infancia
En conclusión, esta xornada de aprendizaxe e concienciación onde as nenas, nenos e adolescentes reflexionaron sobre os Dereitos da Infancia e a importancia de protexer a Convención. Este tipo de actividades non só fomentan o coñecemento dos dereitos da infancia, senón que tamén promoven a participación activa e o empoderamento dos máis novos.
A través destas dinámicas, conseguimos que os nosos mozos e mozas se sintan escoitados e valorados, creando un espazo seguro onde poden expresar as súas ideas e preocupacións. Por este motivo, é fundamental seguir traballando para garantir que todos os nenos, nenas e adolescentes poidan gozar plenamente dos seus dereitos.
Se queredes saber máis sobre as nosas actividades e seguir as nosas iniciativas, non esquezades seguirnos nas redes sociais e visitar o noso blog regularmente.
Xuntos, podemos facer unha gran diferenza!
Para máis información, podedes visitar a nosa páxina web ou seguides as nosas redes sociais.
#DereitosDaInfancia #POIG #DíaDaInfancia2024 #IstoVaideDereitos
Equipo de Redeir@s 🌟
