No Día do Libro celebramos o poder das historias para emocionarnos, removernos por dentro e axudarnos a entender mellor o que sentimos e o que pasa no mundo. Porque os libros non son só palabras: son espellos, xanelas e ás veces tamén altavoces.
Dende Redeir@s compartimos estas tres recomendacións feitas por unha das nosas voluntarias. Son libros pensados para diferentes idades, pero todos teñen algo en común: falan de emocións, de respecto, de identidades e de loita. Historias que nos chegan fondo. Vai un anaquiño de cada unha:
🟡 El monstruo de colores
Un simpático monstro está feito un lío coas emocións. Non sabe recoñecer o que sente, pero cun pouco de axuda aprende a poñer nome á alegría, tristeza, rabia, medo e calma. Un conto visual e didáctico para que os máis pequenos entendan os seus sentimentos.
📖 Idade recomendada: 5 a 8 anos.
🔵 La lección de August (Wonder – R. J. Palacio)
August naceu con unha malformación facial e por primeira vez irá ao colexio. Alí deberá enfrontarse a miradas, prexuízos e tamén descubrirá a forza da amizade, a bondade e o valor de ser un mesmo. Unha historia que conmove e ensina a empatía.
📖 Idade recomendada: 9 a 13 anos.
🔴 El odio que das (The Hate U Give – Angie Thomas)
Starr presencia o asasinato do seu amigo Khalil a mans da policía. A partir de aí, terá que loitar entre o silencio e a verdade, e decidir como usar a súa voz nun mundo cheo de inxustizas. Un relato potente sobre racismo, identidade e loita social.
📖 Idade recomendada: 14 a 17 anos.
E ti, que libro recomendarías?
Estes son só tres exemplos, pero hai moitísimos libros que nos fan pensar, sentir ou mirar o mundo con outros ollos. No grupo de Redeir@s gústanos descubrir novas historias que nos emocionen e nos axuden a entender mellor as realidades das demais persoas.
