O pasado venres 23 de maio, o Parlamento de Galicia converteuse nun espazo de participación infantil e xuvenil coa celebración dun acto no marco da Campaña Mundial pola Educación (CME). A xornada contou coa participación de 73 alumnos e alumnas de catro centros educativos galegos: o Colexio San José da Guía (Vigo), o CPI Virxe da Cela (Monfero, A Coruña), o CEIP Eusebio da Guarda (A Coruña) e o Colexio FEC San José (Lugo).
Desde a Plataforma de Organizacións de Infancia de Galicia sumámonos ao apoio desta iniciativa, xa que pon no centro a voz de nenos, nenas e adolescentes e, ao mesmo tempo, subliña a súa defensa do dereito á educación en situacións de emerxencia, o lema da campaña deste ano.
A xornada, celebrada na Sala do Rexurdimento, estivo presidida pola vicepresidenta primeira do Parlamento, María Elena Candia López, e contou coa presenza de representantes parlamentarios, da Xunta de Galicia. O alumnado participante compartiu as reflexións que elaboraron nos seus centros escolares arredor da importancia de garantir unha educación segura, accesible e de calidade mesmo en contextos de crise humanitaria, conflito ou desastre.
Este acto forma parte das actividades da Semana de Acción Mundial pola Educación (SAME), que busca mobilizar á sociedade civil e aos gobernos para facer realidade o dereito á educación para todas as persoas.
EN Redeir@s queremos destacar o valor de espazos coma este, nos que se recoñece o papel activo da infancia e adolescencia na defensa dos seus dereitos. Escoitar as súas propostas e preocupacións é fundamental para avanzar cara a políticas públicas máis xustas e inclusivas.
