O pasado sábado 25 de outubro o grupo de participación infantil e adolescente Redeir@s reuniuse en Santiago de Compostela para compartir unha nova xornada de encontro, reflexión e creatividade. A actividade desenvolveuse no Centro Don Bosco e serviu para seguir avanzando no traballo colectivo arredor dos dereitos da infancia e a elaboración do Manifesto polo Día da Infancia 2025. A mañá comezou cun momento de benvida e xogos de presentación que axudaron a crear un ambiente de confianza e alegría entre todas as persoas participantes. Despois dunha breve explicación sobre o que se ía facer ao longo do día, deron comezo as primeiras dinámicas, nas que o grupo puido coñecerse mellor e romper o xeo de forma divertida. A continuación, tivo lugar a actividade da Campaña Mundial pola Educación (CME), na que se presentaron os seus principais obxectivos e mensaxes, para despois participar nunha xincana no exterior. A través de diferentes probas e retos, as persoas participantes reflexionaron sobre o dereito á educación e sobre como debería ser unha educación ideal, máis xusta e accesible para todas as persoas. A actividade rematou cun espazo de diálogo conxunto, no que compartiron as ideas e sensacións que foran xurdindo durante o xogo. Xa de volta no espazo de traballo, chegou o momento de centrarse na creación do Manifesto polo Día da Infancia 2025, que este ano leva por lema “Son, es, somos e temos dereitos”. O grupo dividíuse en tres equipos por idades para reflexionar sobre diferentes dereitos, entre eles a intimidade, a identidade, a cultura, o asociacionismo, a participación, o xogo e ocio, a igualdade, a protección fronte á violencia, a educación ou a saúde e o benestar emocional. Cada equipo escolleu os dereitos que máis lles representaban e, a partir de preguntas guía, analizáronos desde diferentes perspectivas: que significan, se se cumpren realmente, que sentimentos xorden cando non se respectan e que podería facerse para mellorar a súa protección. O obxectivo era formular dúas ou tres demandas claras, expresadas con linguaxe directa e desde a súa propia voz, que recollesen as conclusións principais. Despois do xantar retomouse o traballo do manifesto para pechar as propostas e deixar definidas as demandas principais de cada grupo. Unha vez rematado, as persoas participantes tamén tiveron un tempo de xogo libre, necesario para desconectar, compartir e seguir reforzando os vínculos dentro do grupo. A tarde continuou cun obradoiro de deseño de camisetas e calcetíns, no que cada persoa puido decorar a súa propia peza con mensaxes, símbolos e cores inspiradas nos dereitos da infancia, na participación e na identidade do grupo Redeir@s. A actividade, ademais de divertida, serviu para expresar de maneira artística moitas das ideas que foran aparecendo durante o día. Foi unha xornada intensa e moi participativa, na que se mesturaron aprendizaxe, reflexión, amizade e diversión. As ideas, voces e propostas de Redeir@s seguirán agora o seu camiño ata converterse no Manifesto do Día da Infancia 2025, unha declaración feita desde a mirada e as palabras de quen realmente importa: nenos, nenas e adolescentes.