O grupo de participación infantil e adolescente da POIG reuniuse novamente en Santiago de Compostela nunha xornada centrada na participación, os dereitos da infancia, a saúde mental e a creación de grupo.
O pasado sábado 23 de maio, o grupo de participación infantil e adolescente da Plataforma de Organizacións de Infancia de Galicia, Redeir@s, reuniuse novamente en Santiago de Compostela nunha xornada chea de reflexión, participación, convivencia e ocio compartido.
A mañá comezou cun espazo de benvida e xogos de presentación, fundamentais para favorecer que o grupo se coñecera mellor e para integrar ás novas incorporacións deste ano. Ademais, aproveitouse este primeiro momento para explicar que é Redeir@s, que significa participar e o papel do Consello Autonómico de Infancia e Adolescencia (CAIA), no que participan varios nenos, nenas e adolescentes do grupo.
Un dos momentos centrais da xornada foi a preparación e gravación dun podcast creado polos propios rapaces e rapazas. Divididos en grupos, puideron reflexionar e conversar sobre cuestións que lles preocupan especialmente no seu día a día: a saúde mental, as redes sociais, a presión social, o futuro, o instituto ou a importancia de sentirse escoitados/as. A actividade permitiu crear un espazo de diálogo moi enriquecedor no que compartiron experiencias, opinións e propostas desde a súa propia mirada.
Ao longo da mañá tamén se desenvolveu unha actividade vinculada ao Día da Infancia 2025, a través dunha “cume de especialistas en igualdade” na que os NNA traballaron diferentes situacións relacionadas coa igualdade, a discriminación e os dereitos da infancia. A partir do debate e do traballo en equipo, elaboraron reflexións e propostas que servirán para continuar construíndo o manifesto e as accións participativas deste ano.
Despois da comida conxunta e dun tempo de convivencia máis informal, o grupo participou nunha pequena dinámica arredor da saúde mental e da autoestima, creando un espazo seguro no que poder falar das emocións, da presión que moitas veces senten e da importancia do benestar emocional durante a adolescencia.
A xornada rematou cunha actividade lúdica en Diver Jump, onde puideron desfrutar dun espazo de ocio compartido con zonas de salto, escalada e diferentes actividades deportivas. Máis alá da diversión, este tipo de momentos resultan fundamentais para fortalecer vínculos, crear grupo e favorecer que os nenos, nenas e adolescentes se sintan parte dun espazo seguro, participativo e propio.
Desde a POIG queremos agradecer a implicación de todas as persoas participantes, entidades e profesionais que fixeron posible esta nova xuntanza de Redeir@s.
